Доруҳое, ки ба системаи хунофар таъсир мерасонанд

Хун аз элементҳои зерин иборат аст: эритротситҳо (ҷисмҳои сурхи хун), лейкотситҳо (ҷисмҳои сафеди хун) ва тромбоситҳо (лавҳачаҳои хун). Дар организми инсони солим ҳаҷми хун 4-5 литрро ташкил медиҳад. Дар 1мкл. хун дар миқдори миёна 4-5млн. эритротситҳо мавҷуданд. Дар эритротситҳо гемоглобин вуҷуд дорад, ки оксигенро аз шуш ба узвҳо ва гази карбонро аз ҳуҷайраҳо ба шуш мекашонад. Гемоглобин аз сафедаи глобин ва 4 молекулаи гем иборат аст. Гем атоми оҳан дорад. Дар организми инсон оҳан ба миқдори 2-5г мавҷуд аст. 
 Вазифаҳои хун чунинанд: 
1) нафаскашӣ (гемоглобин оксигенро мекашонад…)
2) нақлиётӣ (газҳо, гормонҳо, медиаторҳо, метаболитҳоро мекашонад)
3) ғизоӣ
4) экскреторӣ (хориҷкунӣ)
5) муҳофизатӣ (омили масъуният аст, ки антитела дорад)
6) танзими ҳарорати бадан.
Раванди хунофарӣ дар зери таъсири нейрогуморалӣ мебошад. Ба узвҳои хунофар чунин узвҳо шомиланд: мағзи сурхи устухон, испурч, гиреҳҳои лимфатикӣ, ҷигар, тимус ва ғайраҳо. 
Дар раванди хунофарӣ – эритропоэз ва гемоглобинопоэз, витаминҳои В_12, Вс, Fе, кислотаи аскорбин ва баъзе микроэлементҳо иштирок мекунанд. Вазифаи асосии эритроситҳо кашонидани оксиген ба бофтаҳо ва узвҳо мебошад, ки он ба воситаи гемоглобин иҷро мешавад. Гемоглобин бошад хосияти бо оксиген пайвастшавиро дорад.
 Доруҳое, ки ба системаи хунофарӣ таъсир доранд, ба ду гурӯҳ ҷудо мешаванд:
1. Доруҳое, ки ба эритропоэз таъсир мерасонанд;
2. Доруҳое, ки ба лейкопоэз таъсир мерасонанд.